मुंबई : वांद्रे परिसरात अतिक्रमण हटवण्याच्या कारवाईदरम्यान अचानक हिंसक वळण लागल्याने मोठा तणाव निर्माण झाला. महापालिका आणि पोलिस प्रशासन अतिक्रमण हटवण्यासाठी कारवाई करत असताना काही नागरिकांकडून जोरदार विरोध करण्यात आला. परिस्थिती चिघळल्यानंतर पोलिसांवर दगडफेक करण्यात आली आणि परिसरात काही काळ गोंधळाचे वातावरण निर्माण झाले.
घटनास्थळी मोठ्या प्रमाणात पोलिस बंदोबस्त तैनात करण्यात आला असून परिस्थिती नियंत्रणात आणण्यासाठी अतिरिक्त पोलीस फौज मागवण्यात आली. दगडफेकीत काही पोलिस कर्मचारी किरकोळ जखमी झाल्याची माहिती समोर आली आहे.
महापालिकेकडून रस्ते आणि सार्वजनिक जागांवरील अनधिकृत बांधकामे हटवण्याची मोहीम सुरू होती. मात्र कारवाईदरम्यान काही स्थानिकांनी तीव्र नाराजी व्यक्त करत आंदोलन सुरू केले. काही वेळातच जमाव आक्रमक झाल्याने पोलिसांना परिस्थिती हाताळण्यासाठी हस्तक्षेप करावा लागला.
परिसरातील काही वाहनांचे नुकसान झाल्याचेही सांगितले जात आहे. सुरक्षेच्या कारणास्तव काही भागात वाहतूक तात्पुरती वळवण्यात आली होती. घटनेनंतर परिसरात तणावपूर्ण शांतता असून पोलिसांकडून सतत गस्त वाढवण्यात आली आहे.
दरम्यान, दगडफेक आणि सरकारी कामात अडथळा निर्माण केल्याप्रकरणी काही जणांना ताब्यात घेण्यात आल्याची माहिती मिळत आहे. पोलिसांकडून सीसीटीव्ही फुटेजच्या आधारे पुढील तपास सुरू आहे.
या घटनेमुळे मुंबईतील अतिक्रमणविरोधी कारवायांदरम्यान सुरक्षेचा प्रश्न पुन्हा ऐरणीवर आला असून प्रशासन अधिक सतर्क झाले आहे.
