मुंबई : राज्यातील वैद्यकीय क्षेत्रासाठी महत्त्वाची समजली जाणारी महाराष्ट्र वैद्यकीय परिषदेची (MMC) निवडणूक आज, 26 एप्रिल 2026 रोजी पार पडत आहे. या निवडणुकीत परिषदेच्या ९ जागांसाठी तब्बल ६० उमेदवार मैदानात उतरले असून डॉक्टरांमध्ये चुरशीची लढत पाहायला मिळत आहे.
या निवडणुकीसाठी राज्यभरातील सुमारे १ लाख ४० हजार नोंदणीकृत डॉक्टरांना मतदानाचा अधिकार देण्यात आला आहे. जिल्हानिहाय केंद्रांवर मतदानाची व्यवस्था करण्यात आली असून संपूर्ण प्रक्रिया जिल्हाधिकाऱ्यांच्या देखरेखीखाली पार पडत आहे.
दरम्यान, या निवडणुकीला यंदा राजकीय रंगही चढला आहे. विविध वैद्यकीय संघटनांमध्ये मतभेद निर्माण झाल्यामुळे आणि काही राजकीय पक्षांच्या सक्रिय सहभागामुळे ही निवडणूक अधिक चर्चेत आली आहे.
याशिवाय, राज्य सरकारने यापूर्वी निवडणूक रद्द करून नामनिर्देशन पद्धती लागू करण्याचा निर्णय घेतला होता. मात्र न्यायालयाने तो निर्णय फेटाळल्यानंतर अखेर ही निवडणूक घेण्यात येत आहे. त्यामुळे या निवडणुकीकडे संपूर्ण वैद्यकीय क्षेत्राचे लक्ष लागले आहे.
