देशभरात चर्चेत असलेल्या ट्विशा शर्मा मृत्यू प्रकरणात आता नव्या CCTV फुटेजमुळे खळबळ उडाली आहे. ट्विशाच्या मृत्यूपूर्वीच्या काही तासांतील हालचाली कॅमेऱ्यात कैद झाल्याने तपास यंत्रणांचे लक्ष या फुटेजकडे केंद्रित झाले आहे. या व्हिडिओमुळे आत्महत्या की घातपात, या चर्चेला पुन्हा जोर आला आहे.
समोर आलेल्या माहितीनुसार, ट्विशा शर्मा मृत्यूपूर्वी एका ब्युटी पार्लरमध्ये गेल्याचे CCTV फुटेजमध्ये दिसत आहे. ती तेथे जवळपास तीन तास थांबली होती आणि हेड मसाज घेतल्याची माहिती समोर आली आहे. या फुटेजनंतर तिच्या मानसिक स्थितीबाबत आणि मृत्यूपूर्वीच्या घटनांबाबत अनेक प्रश्न उपस्थित केले जात आहेत.
दरम्यान, आणखी एका CCTV व्हिडिओमध्ये ट्विशाचा पती समर्थ सिंह आणि इतर दोन व्यक्ती तिला जिन्यावरून खाली आणताना दिसत असल्याचा दावा करण्यात आला आहे. या फुटेजमधील वेळ आणि पोलिसांच्या FIR मधील वेळेत मोठी तफावत असल्याने तपास अधिक गूढ बनला आहे.
या प्रकरणात CBI ने तपास हाती घेतल्यानंतर मोठ्या हालचाली सुरू झाल्या आहेत. ट्विशाची सासू आणि निवृत्त न्यायाधीश गिरीबाला सिंह तसेच पती समर्थ सिंह यांना CBI कोठडी सुनावण्यात आली असून दोघांची समोरासमोर चौकशी केली जाणार आहे. पुरावे नष्ट करण्याचा प्रयत्न झाल्याचाही संशय तपास यंत्रणांकडून व्यक्त करण्यात येत आहे.
ट्विशाच्या कुटुंबीयांनी सुरुवातीपासूनच हुंडाबळी आणि मानसिक छळाचे आरोप केले आहेत. तिच्या WhatsApp चॅट्स, कॉल रेकॉर्ड्स आणि CCTV फुटेजच्या आधारे आता तपास अधिक तीव्र करण्यात आला आहे. सर्वोच्च न्यायालयानेही या प्रकरणाची गंभीर दखल घेतल्याने संपूर्ण देशाचे लक्ष या तपासाकडे लागले आहे.
दरम्यान, सोशल मीडियावर या प्रकरणाबाबत संतापाची लाट उसळली असून आरोपींवर कठोर कारवाईची मागणी जोर धरत आहे.
