बारामती विधानसभा मतदारसंघातून 2029 ची निवडणूक नेमकी कोण लढवणार, याबाबत राजकीय वर्तुळात पुन्हा चर्चा रंगू लागली आहे. अजित पवार यांचे पुत्र जय पवार यांनी काही दिवसांपूर्वी “कार्यकर्त्यांची इच्छा” असल्याचं सांगत निवडणूक लढवण्याचे संकेत दिल्यानंतर आता युगेंद्र पवार यांनीही यावर महत्त्वाची प्रतिक्रिया दिली आहे.
मुंबईतील वाय. बी. सेंटर येथे झालेल्या पक्ष बैठकीनंतर माध्यमांशी बोलताना युगेंद्र पवार म्हणाले की, “2029 साठी अजून बराच वेळ बाकी आहे. पुढच्या काही वर्षांत अनेक राजकीय घडामोडी घडू शकतात. त्यामुळे आत्ताच कोण निवडणूक लढवणार यावर भाष्य करणं योग्य ठरणार नाही.”
बारामतीमध्ये पुन्हा एकदा ‘पवार विरुद्ध पवार’ अशी लढत होण्याची शक्यता व्यक्त होत असताना, युगेंद्र पवार यांनी मात्र सावध भूमिका घेतली. “पवार विरुद्ध पवार होईलच याची खात्री नाही,” असं म्हणत त्यांनी भविष्यातील राजकीय समीकरणांबाबत सूचक विधान केलं.
दरम्यान, राष्ट्रवादी काँग्रेसमधील संभाव्य विलिनीकरणाच्या चर्चेलाही त्यांनी पूर्णविराम दिला. पक्षातील वरिष्ठ नेतृत्वाने भूमिका स्पष्ट केली असून आता विलिनीकरणाचा प्रश्नच नसल्याचं त्यांनी सांगितलं.
बारामती मतदारसंघ हा गेल्या अनेक दशकांपासून पवार कुटुंबाचा बालेकिल्ला मानला जातो. त्यामुळे 2029 मध्ये या मतदारसंघात कोण उतरणार, याकडे राज्याच्या राजकारणाचं लक्ष लागलं आहे. कार्यकर्त्यांमध्येही जय पवार आणि युगेंद्र पवार या दोन्ही नावांची जोरदार चर्चा सुरू असल्याने आगामी काळात बारामतीतील राजकीय वातावरण आणखी तापण्याची शक्यता आहे.
